احترموهم ولا تهينوهم

جت الام بابنها وأثناء الكشف بقول للولد عاوزك تبقى شاطر عشان ماما تجيب لك الشوكولاته اللي بتحبها .. فهي ردت عليا و قالتلي لا يا دكتور هو متعاقب ومحروم من الشكولاته .. الولد بص لامه و انفجر و قالها كفاية يا ماما حرام عليكي كل ما تقابلي حد تقوليله اني متعاقب كفاية .. و انفجر في العياط ..  كان هاين عليا اخنق الأم .. انتو بتربو عيالكم مش بتذلوهم ..مفيش عقاب قصاد حد .. لا قريب ولا غريب .. علاقتك بابنك و علاقتك ببنتك لازم تبقى زي علاقتك بمراتك .. خلف الابواب المغلقة ..  نقول تاني .. الغرض من العقاب هو التربية و التقويم .. مش الاهانة و الفضيحة

متجاملوش بنفسية عيالكم.....وتضحكوا علي كلمة تريقة عليهم .. او تزعقولهم مجاملة لحد  .. او تضربوهم عشان تسكتوا حد...

طيب اعاقب ابني ازاى من غير ما اهينه أو اخليه يتعقد ؟؟

 لازم نعرف قبل ما نفكر نعاقب ولادنا ان الأطفال ذاكرتهم قصيرة المدى .. يعني بينسوا بسرعة .. بس للأسف في موضوع العقاب ده بالذات بيكون نسيانهم انتقائي .. يعني هما بينسوا اتعاقبوا ليه بس مينسوش ابدا العقاب نفسه ...

* مهما تعاقب ابنك او تعاقبي بنتك على حاجة .. لو شافك انت بتعملها عمره ما هيبطلها .. هينسى دايما هو اتعاقب ليه و هيفضل يقلدك .. مينفعش تعاقب ابنك على الكدب مثلا وهو شايفك بتكدب .. مينفعش تعاقبي بنتك على الزعيق و الصوت العالي و انتي صوتك جايب اخر الشارع .. خليك دايما واخد بالك من تصرفاتك لأنهم في الاخر مهما تعاقبهم هيقلدوك برضو

* العقاب لازم يبقى فوري وقت وقوع الخطأ .. عشان يرتبط في ذهن الطفل بالخطأ .. مفيش حاجة اسمها تحوشيله  و تكتمي في نفسك و تنفجري مرة واحدة  كده عقابك هيبقى شديد على الفاضي و الطفل مش هيفهم هو اتعاقب ليه اساسا

* بلاش كلمة انا هموتك و انا هدبحك وانا هكسرك ...انتي بتربيهم مش بترعبيهم

* لما الأم تعاقب الأولاد ممنوع تعترض على عقابها ليهم قدامهم ولما الأب يعاقب الأولاد ممنوع تماما تعترضى على عقابه ليهم قدامهم .. العقاب يتنفذ و يكمل حتى لو حضرتك مش مقتنع بيه .. اللي يتقال عليه لا يبقى لا .. الكلام و النقاش بينكم يبقى بعيد عن الطفل

* العقاب ميبقاش عمال على بطال .. في الاخر الطفل هينسى هو بيتعاقب ليه من كتر العقاب .. فوتي شوية .. متعاقبيش على الاخطاء الصغيرة و التافهة و غير المضرة .. اعملي نفسك مش شايفة ووجهيه بعديها للصح

و اخيرا و اهم حاجة في الموضوع لازم نعرف ان العقاب بيجي في الاخر بعد التوجيه و الشرح و الاقناع .. اقعدوا مع ولادكم .. العبوا معاهم .. قربوا منهم .. اتكلموا معاهم ..

امدحوهم كتير و كافؤوهم على كل حاجة كويسة بيعملوها .. مش كده و بس .. امدحوهم كمان على كل حاجة وحشة مش بيعملوها .. المكافئة دايما و ابدا بتجيب نتيجة افضل بكتير من العقاب...